KAWAYAN: Paghabi ng Mayamang Kasaysayan ng Bayan

Isinulat ni: Ashley Jodel T. Dumalag

May isang bayang marikit

Taglay na ganda'y kaakit-akit

Sa hilagang silangan ng lalawigan

Matatagpuan ang kaniyang hantungan

Isang munting bayang pinagpala

Dahil sa Diyos na dinarakila

Kaya naman itong mga mamamayan

Taglay pasasalamat na taimtiman

Ngunit upang lubos na maunawaan

Ang pagpapala rito sa munting bayan

Ating balikan ang kasaysayan

Na hinabi sa yaman nitong kawayan

Nagsimula bilang isang baryo

At ipinagpatuloy ang pagbuo ng kwento

Maraming dagok at pagsubok

Ngunit 'di kailanman nagpalugmok

Sa dakong timog at silangan

Ng noo'y pueblo ng Guilingan

Sa isang malawak na kagubatan

Mga maiilap na hayop, matatagpuan

Sa pusod ng kagubatan

Isang malaking puno, natagpuan

Napag-alaman bilang Calumpang

Na animo'y binabalot ng kahiwagaan

Mula noo'y nanirahan

Mga mamamayan ng karatig-bayan

Partikular na'ng mga taga-Daraitan

Maging ang mga karatig-lalawigan

Sa paglipas ng mga araw

Bagong umaga'y natatanaw

Ang noo'y mumunting baryo lamang

Sumibol ang pag-asang maging bayan

Calumpang ang unang ngalang bigay

Kaunlara't ganda ng buhay ang taglay

Sa pag-andap ng ilawang tinghoy, hindi kalaunan

Itong payak na baryo'y ipinagkamit na maging bayan

Sa loob ng isang taon lamang

Itong baya'y nagtamo ng bagong ngalan

Bilang pagpupugay ng mga mamamayan

Sa ina ng noo'y ulo ng Pilipinas nating hirang

Ngunit itong kasarinla'y 'di rin nagtagal

Animo'y nabalewala ang mga pagpapagal

Muling napasakop sa bayan ng Siniloan

Bumalik sa antas ng pagiging baryo lamang

Ang mga mamamayan ay hindi nasiyahan

Sa kalagayan ng pagiging baryo lamang

Kung kaya't sila ay nagharap ng kahilingan

Na siyang naging daan ng gantimpalang kasarinlan

Ang kaganapang ito ang nagbigay-daan

Sa pagpapatuloy ng panlipunang kaunlaran

Ang mga naninirahan ay nakipagtulungan

Sa pagbuo ng mga paaralan, bahay bayan at simbahan

Sa paglaganap ng kaunlaran

Dito sa munting bayan

Muling sinubok ng panahon

Pinatatag ng pagkakataon

Pumutok ang ikalawang digmaang pandaigdigan

Sa ganitong panahon, malagim ang kinasapitan

Ang payak at tahimik na bayan noon

Nabalot ng sindak nang dahil sa mga Hapon

Lumaganap ang karahasan at mga patayan

Ilan sa nabiktima ay itong mga mamamayan

Ngunit habang ang iba ay nakikihamok

May ilan ding mamamayan na sa Hapon nakilahok

At sa pagdating ng hukbong Amerikano

Walang pagsidlan ng buhay kahit sa mga puno

Kabi-kabila ang pagpatak ng mga bomba at pagputok

Na ang sa mga gusali ang siyang nakatupok

Matapos ang digmaan ay bakas ang kalungkutan

Kung ating mamamasdan ang kalagayan nitong bayan

Siyamnapung bahagdan nitong mga tahanan

Ay siyang naglaho na parang bula lamang

Sa matinding pagdarahop ng mga mamamayan

Paano nga ba muling sisimulan

Ang lahat ng yaman at mga ari-arian

Hindi basta-basta mababawing lubusan

Sa pagdaan ng mga taon ay naging pagsusumikap

Na muling maibangon ang bayang pinangarap

Mula sa mga guho ay nagtayong muli ng mga tahanan

Gayundin ang mga palayan na siyang pangkabuhayan

Sa gayong pagsusumikap ay siyang nakalinang

Sa puso't isipan ng mga mamamayan

Muling nakapagtatag ng mga paaralan

At nadagdagan pa ng mataas na dalubhasaan

Ang minsan nang sinubok ng panahon

Ngayo'y nagbibigay sa buhay ng hinahon

Mas lumaganap pa ang kaunlaran sa ngayon

Na ipinagpapatuloy ng kasalukuyang henerasyon

Sa paglipas ng mahabang panahon

Mas pinagyaman ang nakasanayan noon

Mga kultura at tradisyon

Patuloy na tinatangkilik ngayon

Sa kasaganahan ng mga kawayan

Nahabi ang mayamang kasaysayan

Na siya ngayong isinasalarawan

Sa iba't ibang mga larangan

Ngunit bakit tila naging palaisipan

Ang ngalan nitong bayan

Sa habi pa lamang ng mga kawayan

Tiyak na may mayamang pagkakakilanlan

Kahit na ang bayang ito ay mumunti pa lamang

Wangis nito'y anong karikitan

Yaman nitong taglay ay sadyang kahali-halina

Na siyang sanhi ng pagsibol sa tuwina

Apat na letra ang dito'y ipinangalan

Payak ngunit makabuluhan ang kasaysayan

Kaya sa lahat ng mga mamamayan

Sabay-sabay na ipagmalaki, FAMY, mahal nating bayan!